Nuacht
Cuireann an tOmbudsman beartas caighdeánaithe um láimhseáil gearán i bhfeidhm do na húdaráis áitiúla
Foilsithe
An t-eolas is déanaí
Foilsithe
An t-eolas is déanaí
Ar an Déardaoin, an 15 Eanáir 2026, sheol an tOmbudsman, Ger Deering, agus Cathaoirleach Choiste um Pleanáil Chorparáideach agus Éigeandála Chumann Bainistíochta Contae agus Cathrach na hÉireann (CCMA), agus Príomhfheidhmeannach Chomhairle Contae na Mí, Kieran Kehoe, beartas agus nós imeachta nua caighdeánaithe maidir le láimhseáil gearán do na húdaráis áitiúla ar fud na hÉireann.
Tá foireann ó Oifig an Ombudsman ag obair i gcomhar leis an CCMA chun an beartas a fhorbairt, a chuirfidh cur chuige aonfhoirmeach i leith láimhseáil gearán ar fáil ar fud earnáil na n-údarás áitiúil.
Leagtar amach sa bheartas próiseas simplí chun gearáin a dhéanamh agus a bhainistiú, agus béim ar an toradh is fearr is féidir a bhaint amach idir an pobal agus an t-údarás áitiúil ábhartha. Leanfaidh gach údarás áitiúil de bheith ag bainistiú gearán, ach cuirfidh an beartas comhchoiteann ar chumas cur chuige comhsheasmhach ar fud na n-údarás áitiúil ar fad, agus tacóidh sé le réiteach gearán ar bhealach tráthúil agus cothrom.
Dúirt an tOmbudsman, Ger Deering:
"Is bealach tábhachtach é próiseas láidir gearán chun seirbhísí poiblí a choinneáil cuntasach as a gcuid gníomhaíochtaí. Tacóidh an beartas seo le cur chuige soiléir agus comhsheasmhach maidir le bainistiú agus plé le gearáin ar fud na n-údarás áitiúil ar fad. Cabhróidh sé le rannpháirtíocht idir an pobal agus na comhairlí a neartú agus cuirfidh sé deiseanna foghlama ar fáil a mbeidh seirbhísí níos fearr mar thoradh orthu. Molaim an CCMA agus earnáil an rialtais áitiúil as a gcur chuige réamhghníomhach i leith an bheartais chaighdeánaithe seo a thabhairt isteach.”
Dúirt Cathaoirleach Choiste um Pleanáil Chorparáideach agus Éigeandála an CCMA agus Príomhfheidhmeannach Chomhairle Contae na Mí, Kieran Kehoe:
“Ba mhaith linn buíochas a ghabháil le hOifig an Ombudsman as an tacaíocht a thug siad dúinn le linn an beartas seo a fhorbairt. Bhí a gcuid léargais ar dhearcadh na ngearánaithe fíorluachmhar.”
Cuireadh teimpléad an Bheartais agus an Nós Imeachta um Láimhseáil Gearán ar fáil do na 31 údarás áitiúil ar fad, agus cuirfear i bhfeidhm é ag údaráis áitiúla i gcaitheamh 2026.